فيزيا پيور

 في الفيزياء في كميات بتتعرف تعريف تام لو قولتلك مقدارها(يعني لو قولتلك عدد ووحدة)  زي درجة الحرارة مثلا لو قلتلك درجة حرارة الأوضة ٢٠٠ درجة كيلڤن فانا كده قولتلك كل حاجة انت محتاج تعرفها، دجة الحرارة أو ال Temperature إتحددت تحديد تام لما قولتلك ٣٠ درجة كيلڤن دي إسمها كمية فيزيائية قياسية ، في كيمات فيزيائية تانية بتتعرف تعريف تام لما أقولك مقدار و إتجاه، زي مثلا السرعة المتحهة (ال velocity) فانا لازم أقولك مثلا العربية دي ماشية بسرعة ٨٠ كم/ساعة شرقا، لو عرفت ماشية بمقدار سرعة كام و في أنهي إتجاه، فانا عرفت كل حاجة انا عايز أعرفها و دي إسمها كمية فيزيائية متجهة ، لغة الفيزيا هي الرياضيات و علشان أعرف أوصف الكميات الفيزيائية الي بيكون ليها مقدار و وحدة و إتجاه فانا هستخدم الرياضيات المناسبة للوصف ده و هي رياضيات المتجهات.، المتجه في أبسط تعريفاته الرياضياتية هو قطعة مستقيمة ليها طول طبعا معين و إتجاه معين، لو خدت بالك فوصف زي ده معقول للتعبير عن الكميات المتجهة، فانت لو حطيت نفسك مكان الفيزيائي هتفكر كده برده، تفتكر التوصيف ده للمتجه ممكن نستخدمه إزاي علشان نوصف الكميات المتجه...

 أعداد الكم و الأوربيتالات ده في أول باب في كيميا ٢ث، بس هو الحقيقة كله فيزيا و فيزيا متقدمة كمان، علشان كده قررت أشرحه هنا  إحنا عارفين أن الظواهر الطبيعة المختلفة بتتصرف طبقا للمعادلات الفيزيائية المختلفة، يعني الحركة بتحصل طبقا لقوانين الحركة لنيوتن و تحديدا القانون التاني الي بيربط القوة بالعجلة اللحظية و الي من خلاله و بمجرد معرفة الشكل الرياضي للقوة، بقدر أعرف شكل مسار الحركة الي هيتبعه الجسيم، و بقدر أتنبأ بدقة بكميات فيزيائية زي الموضع و كمية الحركة عند أي زمن، و بنفس الكيفية عند الكلام عن الجسيمات الصغيرة جدا كالإلكترون مثلا، ففي معادلات فيزيائية تانية بيتبعها الأكترون، المعادلة الفيزيائية الأم الي بتوصف تصرف الأكترون، الي من خلالها بقدر أعرف كمية حركة و موضع الأكترون مثلا عند أي لحظة معينة، هي معادلة شرودنجر، بس أستنى، بمجرد ما أذكر إسم شرودنجر لازم تبرمج دماغك تلقائي على حقيقة إنك "يستحيل" هتقدر تعرف معلومة مؤكدة عن الألكترون في أي لحظة، يعني لما قولتلك فوق أن فيه معادلة فيزيائية عن طريقها هتقدر تعرف موضع و كمية حركة الأكترون، كنت أقصد "القيمة المتوسطة" ل...

 القدمة ذات الورنية هي أداة تمكننا من قياس الأطوال المختلفة بضبط يصل ل ٣ أرقام بعد العلامة العشرية و ده طبعا على عكس المسطرة الي أخرها بيكون رقمين بس بعد العلامة العشرية. إزاي بنقيس بيها؟ القدمة زي منت شايف في الصورة الي فوق ليها فكين، انت بتحط الحاجة الي انت عايز تقسها بين الفكين، هتلاحظ أن القدمة فيها تدريجين، تدريج أرقامه كبيرة و  بيبدأ من الصفر و تدريج تاني تحتيه بس أرقامه صغيرة و بيدأ برده من الصفر، التدريج أبو أرقام كبيرة أسمه التدريج الثابت (علشان هو ببساطة ثابت) و كل شرطة عليه ب 1mm، فالشرطة الي مكتوب عندها 1 على التدريج ده معناها 1cm أو 10mm، و  التدريج أبو أرقام صغيرة أسمه تدريج متحرك (تدريج ممكن نحركه) و كل شرطة عليه ب 0.02mm، عرفت منين إن كل شرطة ب 0.02mm؟ هتلاقي مكتوب عليها فوق 0.02mm و بتالي الشرطة الي مكتوب عندها 1 على التدريج ده معناها 0.10mm إزاي بقيس؟  بعد ما حطيت الحاجة الي انا عايز أقيس طولها بين الفكين، ببدأ أعد الشرط بين الصفر الكبير الي على التديريج الثابت و الصفر الصغير الي على التدريج المتحرك، في الصورة الي فوق مثلا هنلاقي إنهم 3 شرط (ببدأ ال...

ا لصيغة المعيارية لكتابة الأعداد هي طريقة لكتابة الأعداد الكبيرة جدا و الصغيرة جدا على الشكل                                   N×10ⁿ  حيث  N هو عدد أكبر من أو يساوي 1 (N ≥1) و أقل من 10 (N<10)     و  الأس n هو أي عدد صحيح  بنعمل ده ليه؟ بنعمله علشان نسهل التعامل مع الأعداد دي في الحسابات المختلفة أمثلة لو كان العدد هو 12345678، بكتبه إزاي في الصيغة المعيارية؟ أول حاجة بتخيل أن في علامة عشرية "." في أول العدد( بتخيل الرقم كده يعني .12345678)،،تاني حاجة ببدأ أحرك العلامة العشرية عدد من المرات نحية الشمال أو اليمين لحد ما العدد الأخير يكون أقل من 10 و أكبر من أو يساوي 1، الأ n هي عدد المرات الي حركت بيها العلامة العشرية و بتكون سالب لو حركت العلامة من الشمال لليمين و موجب لو حركتها من اليمين للشمال، نطبق الكلام ده  -هنحرك العلامة مره واحدة و نشوف هل العدد الناتج أكبر من أو يساوي الواحد و أقل من 10 و إلا لا، لو كانت الأجابة أه، يبقه هنوقف، لو لأ بنكمل تحريك ال...

 في المدونة الي فاتت كنت إتكلمت عن الكميات الفيزيائية و عن الكمية الفيزيائية الطول على سبيل التحدي د و كنت قولت إننا هنقيسه بالمتر، في المدونة دي هنكمل كلام عن المتر و هنتكلم عن الكميات الفيزيائية الكتلة و الزمن. إحنا عرفنا من المدونة الي فاتت إن الطول هيقاس في منهجنا بالمتر و عرفنا المتر ده طويل أد إيه، هنا بقه هنكمل الحكاية و هسأل هو المتر ده وحدة مناسبة للقياس في كل الأوقات؟ لو فكرت فيها هتلاقي أنه لأ، المتر مش هيكون مناسب دايما لقياس كل الأطوال، أوقات كتير بيكون فيها الطول المطلوب قياسه كبير جدا كالمسافات بين المجرات و الكواكب و أوقات بيكون فيها الطول المطلوب قياسه صغير جدا كالمسافات داخل الذرة، طب ده يخلينا نعمل إيه؟ ده يخلينا ندور على وحدات تانية تكون أكبر من المتر و أخرى تكون أٌقل من المتر، طب هنجيب الوحدات دي منين؟ الأجابة هنشتقها من المتر، طب هنشتقها من المتر إزاي؟ بسيطة، كل الي هنعمله هو إننا هنضيف حرف تاني أدام الحرف m   بتاع المتر، الحرف ده بمجرد إضافته هيحول المتر لوحدة تانية يا إما أكبر من المت يا إما أصغر من المتر على حسب الحرف الي إنضاف، فعلى سبيل المثال لو...

 انت كطالب لسه في ١ ث، فدي أول مرة بتاخد فيها فيزيا، فأول حاجة المفروض أقولهالك هي يعني إيه فيزيا؟ كلمة فيزيا تعني الطبيعة، فالفزيا هو العلم التجريبي الي بيهتم بمحاولة فهم وو صف كيفية عمل الطبيعة من أصغر حاجة كالجسيمات الذرية و دون الذرية لأكبر حاجة كالمجرات و الثقوب السوداء، دي شغلانة مين؟ شغلانة الفيزيائي الي معاه دكتوراه، بيعمل كده إزاي؟ بيعمل كده من خلال تكوين تصور في مخيلته عن كيفية عمل الظاهرة الفلانية و بعدها كتابة التصور ده في صورة معادلات رياضية، إزاي بنتأكد أن المعادلات الي كونها الفيزيائي صح؟ أول حاجة بنعملها هي إننا نحل المعادلات الي إتكونت، تاني حاجة بنصمم تجارب ممكن من خلالها نقيس حاجة تنبأت بيها المعادلات، أخر حاجة بنقارن و نشوف هل النتايج الي طلعت من التجربة في إتفاق مع تنبأ المعادلة و إلا لأ، لو إتفقت يبقه ألف مبروك (مؤقتا) للفيزيائي الي وصل للمعادلة، ليه مؤقتا؟ لإن ممكن في المستقبل تجارب تانية تتعمل و تطلع نواتج لا تتفق مع ما تنبأت بيه النظرية ووقتها النظرية هتتحول من كونها الوصف الأدق للطبيعة إلى مجرد تقريب لنظرية أخرى أعم هي الوصف الأدق للطبيعة و البحث هيتوجه لم...