الكميات الفيزيائية و القياس

 انت كطالب لسه في ١ ث، فدي أول مرة بتاخد فيها فيزيا، فأول حاجة المفروض أقولهالك هي يعني إيه فيزيا؟ كلمة فيزيا تعني الطبيعة، فالفزيا هو العلم التجريبي الي بيهتم بمحاولة فهم وو صف كيفية عمل الطبيعة من أصغر حاجة كالجسيمات الذرية و دون الذرية لأكبر حاجة كالمجرات و الثقوب السوداء، دي شغلانة مين؟ شغلانة الفيزيائي الي معاه دكتوراه، بيعمل كده إزاي؟ بيعمل كده من خلال تكوين تصور في مخيلته عن كيفية عمل الظاهرة الفلانية و بعدها كتابة التصور ده في صورة معادلات رياضية، إزاي بنتأكد أن المعادلات الي كونها الفيزيائي صح؟ أول حاجة بنعملها هي إننا نحل المعادلات الي إتكونت، تاني حاجة بنصمم تجارب ممكن من خلالها نقيس حاجة تنبأت بيها المعادلات، أخر حاجة بنقارن و نشوف هل النتايج الي طلعت من التجربة في إتفاق مع تنبأ المعادلة و إلا لأ، لو إتفقت يبقه ألف مبروك (مؤقتا) للفيزيائي الي وصل للمعادلة، ليه مؤقتا؟ لإن ممكن في المستقبل تجارب تانية تتعمل و تطلع نواتج لا تتفق مع ما تنبأت بيه النظرية ووقتها النظرية هتتحول من كونها الوصف الأدق للطبيعة إلى مجرد تقريب لنظرية أخرى أعم هي الوصف الأدق للطبيعة و البحث هيتوجه لمحاولة الإتيان بتلك النظرية الأعم، فدي الفيزيا بإختصار، فانت في الدرس ده هتاخد أداة أساسية بيستخدها الفيزيائي لمحاولة فهم كيفية عمل الظواهر و الي هي الكميات الفيزيائية، يعني إيه كمية فيزيائية؟ الكمية الفيزيائية هو مفهوم بيعبر عن حاجة في الطبيعة زي الطول و الكتلة و الزمن إلخ، فلو جينا نتكلم عن الطول (l) على سبيل المثال، فأول سؤال لازم نسأله هو يعنى إيه طول؟ الطول ما هو إلامسافة بين نقطتين، طب لو كان عندي أطوال زي التالي:
                              _______     ___________
 
و سألتك مين أطول؟ باين جدا أن الطول الي على الشمال أطول، صح؟ طب لو سألتك أطول أد إيه؟ ممكن تقولي طويل نسبيا، هو طويل بس مش طويل أوي، التعبيرات "طويل نسبيا" "طويل أوي" إسمها تعبيرات وصفية و دول تعبيرات غير قابلة للضبط - غير قابلة للضبط مقصود بيها إنك متقدرش تقولي طويل أد إيه بالظبط، كل مقدرت تقولي الطول أد إيه "بالظبط" كل مكانت تعبيراتك مضبوطة - هنا يجي السؤال التالي، إزاي أعبر عن الطوال بشكل مضبوط بعيدا عن الأوصاف المايعة زي طويل و طويل أوي و طويل خالص و هكذا؟ الإجابة هتكون عن طريق  الأرقام، لو قدرت أعبر عن الأطوال بالأرقام، فانا هقدر أوصف الأطوال المختلفة بأي ضبط انا عايزه، طب إزاي هقدر أدي أرقام للأطوال المختلفة ؟ هقدر أعمل ده من خلال حاجة إسمها الوحدة، يعني إيه وحدة؟ الوحدة من الكمية الفيزيائة هي مقدار معلوم من الكمية الفيزيائية، يعني الوحدة من الطول هو طول معلوم، الوحدة من الكتلة هو كتلة معلومة و هكذا، طيب الطول المعلوم ده انا هجيبه منين؟ مش هتجيبه من حتة، إحنا الي هنعمله، هنقول مثلا أن الطول الي تحت ده هو الوحدة ، هنسيمه وحدة طول

                                               _____

  طب إزاي دلوقتي عن طريق الوحدة دي هقدر أدي أرقام للأطوال المختلفة؟ فكر فيها كده، هتلاقي إن الإجابة على السؤال ده هتكون في المقارنة، يعني هقارن الطول المجهول بالوحدة و هشوف الطول المجهول ده فيه "كام" وحدة، جملة هنشوف فيه "كام" وحدة معناها عدد، فبالطريقة دي هقدر أدي أي طول مجهول عدد بيعبر عن مقداره و بالمناسبة عملية المقارنة دي هي القياس، طب تعرف تجيبلي مثال تاني على طول معلوم ممكن أستخدمه كوحدة طول؟ أها، دراعي مثلا، مش دراعي ده طول معلوم؟ يبقه ممكن استخدمه كوحدة و بالمقارنة بيه هقدر أدي أي طول مجهول عدد، إيه تاني؟ ممكن أستخدم الخطوة كوحدة طول، ممكن أستخدم البلاطة كوحدة، الأوضة بقول إن طولها ١٢ بلاطة، فالبلاطة هنا كانت الوحدة، فالملخص هو أن أي طول معلوم ممكن أستخدمه كوحدة طول، طب في المنهج إحنا هنستخدم إيه كوحدة طول؟ هنستخدم وحدة إسمها المتر(m)، طب المتر ده أد إيه؟ المتر الجماعة عرفوه كتالي: جابو ساق مصنوع من  سبيكة البلاتين و الإيريديوم و عملو حفر عند نهايتي الساق و قالو الطول بين الحفرتين دول هو المتر زي ما هو واضح في الشكل تحت

 الكلام الي حكيناه فوق عن الطول هينطبق برده على أي كمية فيزيائة تانية، فبكده انت عرفت يعني إيه كمية فيزيائية ويعني إيه وحدة و يعني إيه قياس، أشوفك مرة تانية.