كيفية القياس بالقدمة ذات الورنية

 القدمة ذات الورنية هي أداة تمكننا من قياس الأطوال المختلفة بضبط يصل ل ٣ أرقام بعد العلامة العشرية و ده طبعا على عكس المسطرة الي أخرها بيكون رقمين بس بعد العلامة العشرية.

إزاي بنقيس بيها؟

القدمة زي منت شايف في الصورة الي فوق ليها فكين، انت بتحط الحاجة الي انت عايز تقسها بين الفكين، هتلاحظ أن القدمة فيها تدريجين، تدريج أرقامه كبيرة و  بيبدأ من الصفر و تدريج تاني تحتيه بس أرقامه صغيرة و بيدأ برده من الصفر، التدريج أبو أرقام كبيرة أسمه التدريج الثابت (علشان هو ببساطة ثابت) و كل شرطة عليه ب 1mm، فالشرطة الي مكتوب عندها 1 على التدريج ده معناها 1cm أو 10mm، و  التدريج أبو أرقام صغيرة أسمه تدريج متحرك (تدريج ممكن نحركه) و كل شرطة عليه ب 0.02mm، عرفت منين إن كل شرطة ب 0.02mm؟ هتلاقي مكتوب عليها فوق 0.02mm و بتالي الشرطة الي مكتوب عندها 1 على التدريج ده معناها 0.10mm

إزاي بقيس؟ 

بعد ما حطيت الحاجة الي انا عايز أقيس طولها بين الفكين، ببدأ أعد الشرط بين الصفر الكبير الي على التديريج الثابت و الصفر الصغير الي على التدريج المتحرك، في الصورة الي فوق مثلا هنلاقي إنهم 3 شرط (ببدأ العد من أول شرطة بعد الصفر)،  3 شرط و كل شرطة ب 1mm، يبقه قراءة التدريج الثابت هتكون 3mm

تاني حاجة ببص على التدريج المتحرك و بشوف مين أول شرطة على التدريج المتحرك منطبقة تماما على أحد شرط التدريج الثابت، في الصورة الي تحت هنلاقي أن الشرطة رقم 29 (هنا برده بداية العد هتكون من أول شرطة بعد الصفر) هي الشرطة المنطبقة تماما مع أحد شرط التدريج الثابت، 29 شرطة و كل شرطة ب 0.02 بقه قراءة التدريج المتحرك هتكون 29×0.02mm يعني هتكون ب0.58mm

القياس الكلي=قراءة التدريج الثابت+قراءة التدريج المتحرك

يبقه القياس الكلي=3mm+0.58mm

 يعني هيساوي 3.58mm أو 0.358cm

ممكن بدل ما أفضل أعد الشرط أعمل التالي:

بالنسبة للتدريج الثابت، انا عارف ان ال 1cm بيساوي 10mm، فبدل ما أعد الشرط من ال 0 لل 0، هعد بس الشرط بعد الارقام المكتوبة على التدريج الثابت، يعني في مثالنا الي فوق ده، فأخر شرطة من الشرط الي هنعدهم كانت الشرطة التالتة بعد الصفر، فانا عارف علطول أن قراءة التدريج الثابت هتكون ب 3mm، طب لو كانت أخر شرطة هي الشرطة التالتة بعد الرقم 5 الي مكتوب على التدريج الثابت، رقم 5 يعني 50mm، فيبقه قراءة التدريج الثابت عند ال شرطة التالتة هتكون 53mm (إفتكر أن كل شرطة على التدريج الثابت ب 1mm)

بنفس الكيفية برده في التدريج المتحرك، الرقم 3 مثلا على التدريج المتحرك يعني 0.30mm، فيبقه قراءة التدريج المتحرك عند الشرطة الرابعة بعد الرقم 3 الي مكتوب على التدريج المتحرك هتكون 0.38mm ( إفتكر أن كل شرطة على التدريج المتحرك ب 0.02mm)، في المثال بتاعنا فوق،  الشرطة الي إنطبقت كانت الشرطة الرابعة بعد الرقم 5 الي مكتوب على التدريج المنزلق، فيبقه قراءة التدريج المتحرك علطول من غير عد من الصفر هتكون ب 0.58mm

(ضربت عدد الشرط (كانو هنا 4 شرط) الي بعد الرقم 5 في 0.02mm و جمعتهم علي ال 0.50mm)

ملاحظات

١-لاقيت مدرس قبل كده بيقول أن ال 0.02mm الي مكتوبة فوق على القدمة دي تعني "نسبة الخطأ" ده كلام مش مظبوط طبعا، الرقم ده بيقولك إن الشرطة الواحدة على التدريج المنزلق ب 0.02mm و في أنواع تانية بيكون مكتوب عليها 0.05mm و دي بنفس الكيفية معناها أن الشرطة على التدريج المنزلق ب 0.05mm، في منهجك انت  فانت عندك بس النوع الأول، يعني القدمة الي مكتوب عليها 0.02mm 

 ٢-في كتاب المدرسة، مكتوب أن قيمة القسم الواحد على التدريج المنزلق ب 0.9mm، القدمة ذات الورنية الي في الكتاب مطابقة تماما للي تحت في الصورة و طبعا دي فيها القسم الواحد على التدريج المنزلق ( الشرطة) ب 0.02mm زي موضحت فوق